തിരുവനന്തപുരം: സംസ്ഥാന സ്കൂൾ കലോത്സവത്തിന്റെ സമാപനത്തോടനുബന്ധിച്ച് നഗരത്തിൽ ഗതാഗത നിയന്ത്രണം ഏർപ്പെടുത്തിയതായി ട്രാഫിക് പൊലീസ് കമ്മിഷണർ അറിയിച്ചു.
സമാപനച്ചടങ്ങിൽ പങ്കെടുക്കാനെത്തുന്നവർ സെക്രട്ടേറിയറ്റ് ഗേറ്റ് 2ൽ (ആസാദ് ഗേറ്റ്) വാഹനമിറങ്ങി സ്റ്റേഡിയത്തിന്റെ തെക്കുഭാഗത്തെ ഗേറ്റ് (വൈ.എം.സി.എ) വഴി അകത്ത് പ്രവേശിക്കണം.
വലിയ വാഹനങ്ങൾ ആറ്റുകാൽ ക്ഷേത്രത്തിന്റെ പാർക്കിംഗ് ഗ്രൗണ്ടിലും പൂജപ്പുര ഗ്രൗണ്ടിലും പാർക്ക് ചെയ്യണം. പുളിമൂട് മുതൽ ആയുർവേദ കോളേജ് വരെയും ആയുർവേദ കോളേജ് മുതൽ കുന്നുംപുറം വരെയുള്ള റോഡിലും മാഞ്ഞാലിക്കുളം ഗ്രൗണ്ടിലും യൂണിവേഴ്സിറ്റി സെനറ്റ് ഹാൾ പരിസരത്തും സംസ്കൃത കോളേജ് പാർക്കിംഗ് ഗ്രൗണ്ടിലുമാണ് ചെറിയ വാഹനങ്ങൾ പാർക്ക് ചെയ്യേണ്ടത്.
ഉച്ചയ്ക്ക് 2 മുതൽ റിസർവ് ബാങ്ക്, ബേക്കറി ജംഗ്ഷൻ, വാൻറോസ് എന്നിവിടങ്ങളിൽ നിന്ന് സെക്രട്ടേറിയറ്റ് ഭാഗത്തേക്ക് വലിയ വാഹനങ്ങൾ അനുവദിക്കില്ല.പ്രസ് ക്ലബ് ഭാഗത്തുനിന്ന് സെക്രട്ടേറിയറ്റ് അനക്സസിലേക്ക് പോകുന്ന വാഹനങ്ങൾ പ്രസ് ക്ലബ് – ഊറ്റുകുഴി – വാൻറോസ് – ജേക്കബ്സ് വഴി പോകണം.ഈ ഭാഗങ്ങളിൽ വാഹനങ്ങൾ പാർക്ക് ചെയ്യാൻ അനുവദിക്കില്ല.
സെൻട്രൽ സ്റ്റേഡിയത്തിനും സെക്രട്ടേറിയറ്രിനും ചുറ്റിലുള്ള റോഡുകളിൽ രാവിലെ മുതലെ പാർക്കിംഗിന് വിലക്കേർപ്പെടുത്തിയിട്ടുണ്ടെന്നും പൊലീസ് കമ്മിഷണർ അറിയിച്ചു.
