മുലപ്പാൽ തൊണ്ടയിൽ കുടുങ്ങി; നാലുമാസം പ്രായമുള്ള കുഞ്ഞിനു ദാരുണാന്ത്യം

തിരുവല്ലം : മുലപ്പാൽ തൊണ്ടയിൽ കുടുങ്ങി നാലുമാസം പ്രായമുള്ള കുഞ്ഞിനു ദാരുണാന്ത്യം.

തിരുവല്ലം പ്ലാങ്ങൽ ജാനകി കല്യാണമണ്ഡപത്തിനു സമീപം ടി.സി. 65/1434ൽ ഡോ. അരുൺ മിത്രയുടെയും നിമ്മി എസ്. ലാലിന്റെയും മകനായ നിയാൻ മിത്രയാണ് മരിച്ചത്.

ചൊവ്വാഴ്ച രാത്രി കുഞ്ഞിന് മുലപ്പാൽ കൊടുത്തിരുന്നു. തുടർന്ന് അമ്മയും കുഞ്ഞും ഉറങ്ങി. ബുധനാഴ്ച രാവിലെ ആറരയോടെ അമ്മ കുഞ്ഞിനെ ഉണർത്താൻ ശ്രമിച്ചപ്പോഴാണ് അനക്കമില്ലാത്ത നിലയിൽ കണ്ടത്.

അമ്പലത്തറയിലെ സ്വകാര്യ ആശുപത്രിയിലെത്തിച്ചുവെങ്കിലും മരിച്ചതായി ഡോക്ടർ അറിയിച്ചു.  രണ്ടരവയസ്സുള്ള നിമിത് മിത്ര സഹോദരനാണ്.