തിരുവനന്തപുരം: സ്വകാര്യ ബസ് സ്കൂട്ടറിൽ ഇടിച്ച് ആയുർവേദ ഡോക്ടർ മരിച്ചു. പേരാമംഗലം സഞ്ജീവനി പ്രകൃതിചികിത്സാകേന്ദ്രത്തിലെ മെഡിക്കൽ ഓഫീസർ ഡോ. നിത്യ (31)യാണ് മരിച്ചത്.പേരാമംഗലം അമല ആശുപത്രിക്കു സമീപം തിങ്കളാഴ്ച രാവിലെ ഒമ്പതോടെയായിരുന്നു അപകടം. പിറകിൽ വന്ന സ്വകാര്യബസ് മറികടക്കാൻ ശ്രമിക്കവേ പിൻവശം സ്കൂട്ടറിൽ തട്ടുകയായിരുന്നു. ജോലിസ്ഥലത്തേക്ക് പോകുകയായിരുന്ന ഡോ. നിത്യ ബസിന്റെ പിൻചക്രത്തിനടിയിലേക്കാണ് തെറിച്ചുവീണത്.
തിരുവനന്തപുരം നാലാഞ്ചിറ പാറോട്ടുകോണം ടെമ്പിൾ റോഡ് ലില്ലി ഡെയിൽ വീട്ടിൽ പരേതനായ മധുവിന്റെയും ഉഷയുടെയും മകളാണ്. പോസ്റ്റ്മോർട്ടത്തിനുശേഷം മൃതദേഹം ചൊവ്വാഴ്ച വീട്ടുവളപ്പിൽ സംസ്കരിക്കും.ഭർത്താവ്: മുറ്റിച്ചൂർ തണ്ടാശ്ശേരി വീട്ടിൽ ടിന്റു ഉണ്ണികൃഷ്ണൻ. രണ്ടുവയസ്സുള്ള ധ്രുവ് കൃഷ്ണയാണ് മകൻ
