തിരുവല്ലം: പുഞ്ചക്കരിയിൽ വീട്ടുമുറ്റത്ത് നിന്ന എസ്ഐയെയും ഭാര്യയെയും ആക്രമിച്ചു പരുക്കേൽപ്പിച്ചു. വിഴിഞ്ഞം കോസ്റ്റൽ പൊലീസ് സ്റ്റേഷൻ എസ്ഐ തിരുവല്ലം പുഞ്ചക്കരി ഗോകുലത്തിൽ എസ്.ഗിരീഷ്കുമാർ(50), ഭാര്യ ശ്രീകല(48) എന്നിവർക്കു നേരേയാണ് ഇന്നലെ രാവിലെ ബൈക്കിൽ എത്തിയ രണ്ടംഗ സംഘത്തിന്റെ ആക്രമണം.
ഹോളോബ്രിക്സ് കട്ട കൊണ്ടുള്ള ഏറിൽ ഗിരീഷിന്റെ മുഖത്തും നെഞ്ചിലും സാരമായി പരുക്കേറ്റു. ഭാര്യയുടെ കൈക്കാണ് പരുക്ക്.അക്രമികളിലൊരാളിനെ വാഹനം സഹിതം നാട്ടുകാർ പിടികൂടി തിരുവല്ലം പൊലീസിനു കൈമാറി.
റോഡിനോട് ചേർന്ന വീട്ടിൽ പൊങ്കാല അർപ്പിക്കാൻ മുറ്റം വൃത്തിയാക്കുകയായിരുന്ന ശ്രീകലയെ ബൈക്കിൽ എത്തിയ രണ്ടംഗ സംഘം അസഭ്യവർഷം നടത്തുകയും കൈയിൽ പിടിച്ചു തിരിക്കുകയും ചെയ്തെന്ന് ഗിരീഷ് പറഞ്ഞു.
