കാട്ടാക്കട: ലഹരി കിട്ടാത്തതിനെ തുടർന്ന് യുവാവ് മൊബൈൽ ടവറിന് മുകളിൽ കയറി ഭീഷണി മുഴക്കി. വ്യാഴാഴ്ച രാവിലെ 7.45 ഓടെയാണ് സംഭവം. പന്നിയോട് സ്വദേശി കിരൺ (30) ആണ് പന്നിയോട് ആർ.സി പള്ളിക്ക് സമീപത്തെ എയർസെൽ ടവറിൽ കയറി പരിഭ്രാന്തി സൃഷ്ടിച്ചത്.
ടവറിന് മുകളിൽ കയറി ഇയാൾ ലഹരി വേണമെന്ന് ആവശ്യപ്പെട്ടു. നാട്ടുകാർ ഇയാളെ പിന്തിരിപ്പിക്കാൻ ശ്രമിച്ചെങ്കിലും മുകളിലേക്ക് കയറിയതോടെ പൊലീസിനെയും ഫയർ ഫോഴ്സിനെയും വിവരമറിയിച്ചു.
കാട്ടാക്കട പൊലീസും കള്ളിക്കാട് ഫയർഫോഴ്സും സ്ഥലത്തെത്തി ഇയാളെ അനുനയിപ്പിക്കാൻ ശ്രമിച്ചെങ്കിലും വിജയിച്ചില്ല. 9ഓടെ യുവാവിന്റെ കൂട്ടുകാരെത്തി ലഹരി മരുന്ന് നൽകാമെന്ന് പറഞ്ഞതോടെ ഇയാൾ താഴെയിറങ്ങിയ ശേഷം ഓടി രക്ഷപ്പെട്ടു.
