തിരുവനന്തപുരം:മാലിന്യ നിർമ്മാർജനത്തിൽ പുത്തൻ മാതൃക തീർത്ത് സ്കൂൾ കലോത്സവം, വൃത്തിയുടെ ചാമ്പ്യന്മാർ തിരുവനന്തപുരം കോർപറേഷനെന്ന് മന്ത്രി എം ബി രാജേഷ്, ശുചീകരണ തൊഴിലാളികളെ നേരിട്ടെത്തി അഭിനന്ദിച്ചു.
പൂർണമായും ഗ്രീൻ പ്രോട്ടോക്കോൾ പാലിച്ച് സ്കൂൾ കലോത്സവം വിജയകരമായി പൂർത്തിയാക്കിയ തിരുവനന്തപുരം കോർപറേഷനെ തദ്ദേശ സ്വയം ഭരണ വകുപ്പ് മന്ത്രി എം ബി രാജേഷ് അഭിനന്ദിച്ചു.
പതിനായിരക്കണക്കിന് ആളുകൾ വന്ന ഒരു മേളയുടെ മാലിന്യ സംസ്കരണം പരാതികളൊന്നുമില്ലാതെ ഏറ്റെടുത്ത് വിജയിപ്പിക്കാൻ കോർപറേഷന് കഴിഞ്ഞു. വലിച്ചെറിയൽ ഏതാണ്ട് പൂർണമായും ഒഴിവായ ക്ലീൻ-ഗ്രീൻ കലോത്സവം കൂടിയായാണ് തിരുവനന്തപുരത്തെ കലോത്സവം ചരിത്രത്തിൽ ഇടംപിടിക്കുന്നത്. കലോത്സവത്തെ വൃത്തിയുടെ ഉത്സവമാക്കി മാറ്റാൻ കോർപറേഷന് കഴിഞ്ഞു.
മാലിന്യ സംസ്കരണം കൃത്യമായി നടത്തിയ കോർപറേഷന് എ പ്ലസ് ഗ്രേഡ് നൽകാമെന്നും മന്ത്രി പറഞ്ഞു. കലോത്സവങ്ങൾ മാത്രമല്ല, പൊതുപരിപാടികളാകെ എങ്ങനെ നടത്തണമെന്ന് കേരളത്തിന് മുന്നിൽ പുതിയ മാതൃക സമ്മാനിച്ച തിരുവനന്തപുരം കോർപറേഷനെ മന്ത്രി അഭിനന്ദിച്ചു.
