വിഴിഞ്ഞം സ്വദേശിയായ യുവാവ് അബുദാബിയില്‍ മരിച്ചു. വിഴിഞ്ഞം ഠൗണ്‍ഷിപ്പ് ജീലാനി നഗറിന് സമീപം ഹൗസ് നമ്പര്‍ 297ല്‍ അയ്യൂബ് ഖാന്‍ (36) ആണ് മരിച്ചത്.
ആറ് മാസം മുമ്പ് വിസിറ്റിങ് വിസയില്‍ യുഎഇയില്‍ എത്തിയ അദ്ദേഹം വിസാ കാലാവധി കഴിഞ്ഞതിനെ തുടര്‍ന്ന് നാട്ടിലേക്ക് യാത്ര തിരിക്കുന്നതിന് മണിക്കൂറുകള്‍ക്ക് മുമ്പായിരുന്നു മരണം.
ശനിയാഴ്ച രാവിലെയാണ് അയ്യൂബ് ഖാന്‍ നാട്ടിലേക്ക് വരാനിരുന്നത്. ഹൃദയാഘാതമാണ് മരണ കാരണം. നടപടികള്‍ പൂര്‍ത്തിയാക്കി മൃതദേഹം അബുദാബിയില്‍ ഖബറടക്കി. ഭാര്യ – ഷാജിന. മക്കള്‍ – അസ്‍ലം, അസ്‍ന.
