കാട്ടാക്കട:കാട്ടാക്കട മണ്ഡലത്തിലെ വിവിധ പദ്ധതികളുടെ പുരോഗതി വിലയിരുത്താൻ കളക്ടറേറ്റ് കോൺഫറൻസ് ഹാളിൽ ഐ.ബി. സതീഷ് എം.എൽ.എയുടെ സാന്നിധ്യത്തിൽ യോഗം ചേർന്നു.
ജില്ലാ കളക്ടർ ജെറോമിക് ജോർജിന്റെ അധ്യക്ഷതയിലായിരുന്നു യോഗം. റോഡ് ഇൻഫാസ്ട്രക്ചർ കേരള വഴി നടപ്പാക്കുന്ന കരമന – വെള്ളറട റോഡിന്റെ നിർമ്മാണത്തിന് പുതുക്കിയ ഡി.പി.ആർ തയ്യാറാക്കാൻ യോഗം തീരുമാനിച്ചു.
ചട്ടമ്പിസ്വാമി സ്മാരകം നിർമ്മിക്കുന്നതിനുള്ള ഭൂമി ഏറ്റെടുക്കൽ നടപടി ഓഗസ്റ്റ് ഒന്നിനകം പൂർത്തീകരിക്കാനും തീരുമാനമായി. കിഫ്ബി ഫണ്ട് ഉപയോഗിച്ച് കെ ആർ എഫ് ബി വഴി നടപ്പിലാക്കുന്ന പൊട്ടൻകാവ്- നെല്ലിക്കാട് – തൂങ്ങാംപാറ -തെരളിക്കുഴി റോഡ്, ചൊവ്വള്ളൂർ- മൈലാടി, നെടുങ്കുഴി- പരുത്തൻപാറ റോഡ് എന്നിവയുടെ എഫ് ഡി ആർ രീതിയിലുള്ള നിർമ്മാണം വേഗത്തിലാക്കാനും തീരുമാനിച്ചു.
ഊരുട്ടമ്പലം വില്ലേജ് ഓഫീസിന് സമീപം സ്ത്രീ സൗഹൃദ കാത്തിരിപ്പ് കേന്ദ്രം നിർമ്മിക്കുന്നതിനുള്ള സ്ഥലം കണ്ടെത്തി. യോഗത്തിൽ കാട്ടാക്കട മണ്ഡലത്തിലെ വിവിധ വകുപ്പുകളിലെ ഉദ്യോഗസ്ഥരും പങ്കെടുത്തു.