പോത്തൻകോട് :ബന്ധുക്കൾ തമ്മിലുള്ള വഴക്കിൽ കൈകാലുകൾ അടിച്ചൊടിച്ച സംഭവത്തിൽ വട്ടപ്പാറ അമ്പലനഗർ അരുൺഭവനിൽ കെ. അരുൺദാസ് (28), പിതാവ് കൃഷ്ണൻകുട്ടി (60) എന്നിവരെ പൊലീസ് അറസ്റ്റു ചെയ്തു. ഇവരുടെ ബന്ധുവും അയൽവാസിയുമായ അമ്പലനഗർ വീട്ടിൽ ആർ.അപ്പു (60) വിനാണ് മ‍ദ്ദനമേറ്റത്.തിങ്കളാഴ്ച രാത്രി 10ഓടെയാണ് സംഭവം.
വീട്ടിൽ നിന്നും മൺവെട്ടിയും മറ്റും കാണാതായെന്നു ആരോപിച്ച് അപ്പു മദ്യപിച്ച ശേഷം കൃഷ്ണൻകുട്ടിയുടെ വീടിനു മുന്നിലെത്തി അസഭ്യം പറഞ്ഞു. ഇതിൽ പ്രകോപിതനായി അരുൺ ദാസ് ക്രിക്കറ്റ് ബാറ്റ് കൊണ്ട് അപ്പുവിന്റെ കൈകളും കൃഷ്ണൻകുട്ടി കുറുവടി കൊണ്ട് കാലും അടിച്ചൊടിക്കുകയായിരുന്നുവെന്നു പൊലീസ് പറഞ്ഞു.കൈകാലുകൾ ഒടിഞ്ഞ അപ്പുവിനെ വട്ടപ്പാറ പൊലീസ് മെഡിക്കൽകോളജ് ആശുപത്രിയിലാക്കി.
