തിരുവനന്തപുരം: ഈ അധ്യയന വര്ഷത്തിന് സമാപനം കുറിച്ച് സംസ്ഥാനത്തെ സ്കൂളുകള് ഇന്ന് അടയ്ക്കും. മധ്യവേനല് അവധിക്കായി വൈകീട്ട് അഞ്ചുമണിക്കാണ് സ്കൂളുകള് അടയ്ക്കുക.
ഉച്ചഭക്ഷണ പദ്ധതി പരിധിയില് ഉള്പ്പെട്ട അഞ്ചുകിലോ അരി വാങ്ങാന് ബാക്കിയുള്ള വിദ്യാര്ത്ഥികള് ഇന്നു തന്നെ കൈപ്പറ്റണമെന്ന് അറിയിച്ചിട്ടുണ്ട്.
പുതിയ അധ്യയന വര്ഷത്തിന് തുടക്കം കുറിച്ച് സംസ്ഥാനത്തെ സ്കൂളുകള് ജൂണ് ഒന്നിന് തുറക്കും. ഒന്നാം ക്ലാസ് പ്രവേശന നടപടികള് ഏപ്രില് 17 ന് ആരംഭിക്കും. മെയ് രണ്ടിന് ശേഷം ടിസി കൊടുത്തുള്ള പ്രവേശനം നടത്തും.
ഒന്നാം ക്ലാസ് മുതല് ഒമ്പതാം ക്ലാസ് വരെയുള്ള ക്ലാസുകളിലെ പരീക്ഷകളുടെ ഫലപ്രഖ്യാപനം മെയ് രണ്ടിന് നടത്തും.അവധിക്കാലത്ത് സ്കൂളുകളില് നിര്ബന്ധിത പരിശീലന ക്ലാസ് നടത്തരുതെന്ന് ബാലാവകാശ കമ്മീഷന് ഉത്തരവിട്ടിട്ടുണ്ട്.