തിരുവനന്തപുരം:ആറ്റുകാൽ പൊങ്കാല പ്രമാണിച്ച് ചൊവ്വാഴ്ച പ്രത്യേക ട്രെയിനുകൾ സർവീസ് നടത്തും. മറ്റുള്ളവയ്ക്ക് അധിക സ്റ്റോപ്പും അനുവദിച്ചതായി തിരുവനന്തപുരം റെയിൽവേ ഡിവിഷൻ അറിയിച്ചു. തിങ്കളും ചൊവ്വയും മൂന്ന് അൺ റിസർവ്ഡ് എക്സ്പ്രസ് സ്പെഷ്യൽ ട്രെയിനുകൾക്ക് കൂടുതൽ സെക്കൻഡ് ക്ലാസ് ജനറൽ കോച്ചുകൾ ഉണ്ടാകും.
എറണാകുളം ജങ്ഷനിൽനിന്ന് ഏഴിന് പുലർച്ചെ 1.45-ന് പുറപ്പെട്ട് രാവിലെ 6.30-ന് തിരുവനന്തപുരത്ത് എത്തുന്നതാണ് ഒന്ന്. തിരുവനന്തപുരത്തുനിന്ന് ഉച്ചയ്ക്കുശേഷം 3.30-ന് തിരിക്കുന്ന ട്രെയിൻ രാത്രി 8.15-ന് എറണാകുളം ജങ്ഷനിൽ എത്തും. കോട്ടയം വഴിയാണ് ഇവ സർവീസ് നടത്തുന്നത്. തിരുവനന്തപുരം- നാഗർകോവിൽ ട്രെയിൻ ഉച്ചകഴിഞ്ഞ് 2.45-ന് പുറപ്പെട്ട് വൈകീട്ട് 4.30-ന് നാഗർകോവിലിൽ എത്തും.
മംഗളൂരു-തിരുവനന്തപുരം (നമ്പർ 16348) എക്സ്പ്രസിന് തിങ്കളാഴ്ച പുലർച്ചെ പരവൂർ, വർക്കല, കടയ്ക്കാവൂർ എന്നീ സ്റ്റേഷനുകളിൽ സ്റ്റോപ്പ് അനുവദിച്ചു. ആറിന് പുറപ്പെടുന്ന മധുര-തിരുവനന്തപുരം അമൃത എക്സ്പ്രസിന് ചൊവ്വാഴ്ച പുലർച്ചെ പരവൂർ, ചിറയിൻകീഴ് സ്റ്റേഷനുകളിൽ നിർത്തും.
മുംബൈ-തിരുവനന്തപുരം (16331) പ്രതിവാര എക്സ്പ്രസ് ചൊവ്വാഴ്ച പുലർച്ചെ പരവൂർ, കടയ്ക്കാവൂർ, ചിറയിൻകീഴ്, കഴക്കൂട്ടം സ്റ്റേഷനുകളിൽ നിർത്തും. മംഗളൂരൂ-തിരുവനന്തപുരം മാവേലി എക്സ്പ്രസിന് ചൊവ്വാഴ്ച കടയ്ക്കാവൂർ, ചിറയിൻകീഴ് സ്റ്റേഷനുകളിൽ സ്റ്റോപ്പ് അനുവദിച്ചു. ചെന്നൈ സെൻട്രൽ- തിരുവനന്തപുരം സൂപ്പർ ഫാസ്റ്റ് ട്രെയിൻ പുലർച്ചെ ചിറയിൻകീഴിൽ നിർത്തും.
നാഗർകോവിൽ-മംഗളൂരു ഏറനാട് എക്സ്പ്രസിന് (16606) എരണിയൽ, കുഴിത്തുറ, പാറശ്ശാല, നെയ്യാറ്റിൻകര, ബാലരാമപുരം സ്റ്റേഷനുകളിൽ സ്റ്റോപ്പ് അനുവദിച്ചു. മധുര-പുനലൂർ എക്സ്പ്രസ്(16729) ചൊവ്വാഴ്ച പുലർച്ചെ പള്ളിയാടി, കുഴിത്തുറ വെസ്റ്റ്, ബാലരാമപുരം സ്റ്റേഷനുകളിൽ നിർത്തും. നാഗർകോവിൽ-മംഗളൂരു പരശുറാം എക്സ്പ്രസിന് (16650) ബാലരാമപുരത്തും നേമത്തും സ്റ്റോപ്പ് അനുവദിച്ചു.
ദിവസേനയുള്ള നാഗർകോവിൽ-കോട്ടയം അൺറിസർവ്ഡ് എക്സ്പ്രസ് (16366) ചൊവ്വാഴ്ച തിരുവനന്തപുരം സെൻട്രലിൽനിന്ന് അരമണിക്കൂർ വൈകി 3.05-ന് പുറപ്പെടും. ചൊവ്വാഴ്ച 2.40-ന് കൊച്ചുവേളിയിൽനിന്നു പുറപ്പെടേണ്ട അൺറിസർവ്ഡ് സ്പെഷ്യൽ 3.40-ന് പുറപ്പെടും.